Nun contexto de paradoxo no que a democratización dos medios de produción cinematográfica é maior que nunca e, ao mesmo tempo, os circuítos de financiamento estréitanse cada vez máis con respecto ao volume de proxectos, cómpre ser quen de deseñar un esquema de financiamento, produción e explotación ad hoc para cada película, buscando solucións creativas que máis aló de modelos preestablecidos e ineficaces, especialmente, para as narrativas audiovisuais máis radicais e as voces noveis.

Neste seminario, dirixido e impartido por Jesús Choya, produtor emerxente que actualmente dirixe LAZONA Zinema e combina proxectos de cineastas emerxentes onde prima a creatividade e o risco con producións entroncadas nos estándares industriais máis convencionais, exploraremos os camiños posibles que inspiren a cineastas noveis na realización das súas primeiras ideas orixinais, con especial foco na figura do produtor como axente esencial no acompañamento creativo; os retos e obstáculos máis habituais aos que se enfrontan, con exemplos de casos reais, e debateremos sobre o equilibrio entre industria e risco e a situación presente e futura da nosa cinematografía. Todo isto desde unha perspectiva participativa a partir da cal poidamos extraer recursos prácticos e praxes que permitan cristalizar os nosos proxectos.

Descubriremos portas ás que podemos chamar e entenderemos que debemos crear outras, co obxectivo de converter os desgustos e a frustración que pode supor levantar unha primeira película coa certeza de que outro modelo é posible.