As zonas húmidas son espazos de transición entre a terra firme e a auga. Non pertencen totalmente a ningún dos dous mundos: son un espazo intermedio onde as correntes se desaceleran e os materiais que arrastran poden transformarse. Ese movemento da auga é un espazo de transformación onde se recollen sedimentos, compostos químicos, restos do que ocorre na paisaxe. Alí deposítanse, mestúranse, descompóñense, reorganízanse.

Algo parecido ocorre coa memoria. Os feitos do pasado chegan a ese territorio intermedio entre a historia e o presente. Como a auga que entra na zona húmida, traen consigo sedimentos: relatos, documentos, silencios, versións contraditorias. A memoria non os elimina, retenos e procésaos da forma que pode. Ás veces, retenos de forma subliminar e nárraos a través da comunicación explícita ou do silencio.

O obradoiro afondou en historias, arquivos e relatos tras os inherentes itinerarios de investigación, reflexión, dúbida e reorientación. Escolleuse un espazo que resemantiza e redimensiona o contexto xeográfico, histórico e natural da cidade de Pontevedra: As Marismas da Xunqueira de Alba, un ecosistema húmido de costa cuxa biodiversidade estimulou a creatividade do alumnado —evidenciando a evolución e as transformacións dos proxectos desde a idea primixenia ata a súa formalización audiovisual— e a experimentación cuns substratos temporais e históricos inherentes a ese singular lugar.

Neste contexto, dez estudantes desenvolveron proxectos individuais de curtametraxes que se conformaron ao longo das distintas etapas que estruturaron este obradoiro.