Baixo o influxo de Chris Marker, LATEXOS promove a interacción entre imaxes e sons que aspiran a nutrirnos evitando calquera ortodoxia ou dogma.
Catro filmes que afondan nas posibilidades discursivas do medio comparten protagonismo na novena edición de Novos Cinemas. A exploración do imaxinario feminino, da linguaxe e do pasado mediante o rexistro da vida cotiá de tres mulleres de distinta orixe, encontra certa resonancia nunha proposta que atopa nunha frutífera performatividade especular a vía ideal para explorar as relacións de parella. Por outra banda, e continuando co rexistro do íntimo, un abocetado mito de Ulises sirve de coartada para ilustrar conceptos como a errancia, a ausencia e o retorno ao fogar. Unha cuarta e proposta de observación utiliza o polisémico concepto de postal para falar dos barrios das nosas urbes, da súa idiosincrasia, da súa intrahistoria e da súa deriva: a profunda transformación xeográfica, ideolóxica e sentimental que os ameaza.