Adrián Canoura estuda en Realización e Produción Audiovisual (Fundación TIC, EIS Lugo) e especialízase en Cámara e Realización (Escola de Ficción de Voz Audiovisual, A Coruña). En 2016 trasládase a Madrid para cursar o prestixioso Master LAV. No 2018, a Academia Galega do Audiovisual noméao novo talento, e a crítica e teórica Nicole Brenez escolle Caerán Lóstregos do Ceo como un dos traballos do ano. As súas películas foron proxectadas en festivais como Curtas Vila do Conde, Fibda, Fracto Berlin, Filmadrid, Nouveau Cinema, FICCI de Cartaxena de Indias ou Sao Paulo. O traballo de Canoura abarca proxectos híbridos entre documental e ficción, aproximacións experimentais á vídeo-creación, traballo con arquivo ou creacións máis contemporáneas. Actualmente enfoca o seu traballo na creación audiovisual en directo para bandas como Baiuca, Sen Senra e Guitarricadelafuente, coas que percorre escenarios nacionais e festivais de todo o mundo, como o de Marrakech, Bogotá, Quito, Milán, París, Xenebra, Budapest ou Ciudad de México.

Daniel Martins Pinheiro Maciel é membro da Asociación AO NORTE, onde asume as funcións de codirector dos festivais Encontros de Cinema de Viana e MDOC – Festival Internacional de Documental de Melgaço. Coordina os proxectos Fotomemória e Quem Somos Os Que Aquí Estamos. Tamén é Coordinador-Xeral da Conferencia Internacional de Cinema de Viana e director da revista CINEMAS. Antropólogo, e investigador do IDMAIS – Instituto de Pesquisa em Design, Media e Cultura no IPCA – Instituto Politécnico do Cávado e do Ave, é autor e editor de libros, artigos e textos, e produtor nas áreas do documental e a non-ficción.

Vanessa Badagliacca é historiadora da arte e educadora. É doutora en Historia da arte pola FCSH-Universidade Nova de Lisboa. A súa investigación académica, en interacción coa súa práctica curatorial, explora os enredos entre a vida vexetal, as cuestións ambientais e as prácticas artísticas, cun enfoque informado pola ciencia, a eco-crítica e os novos materialismos, centrándose principalmente na Península Ibérica e América Latina desde unha perspectiva transnacional. Tamén se dedica á práctica de editar e escribir para exposicións e revistas. Actualmente colabora tamén co Festival de cinema FILMADRID na sección de SMART7, unha rede de festivais que mostra as revelacións do cinema europeo.