INSCRIPCIÓNS NO WHATSAPP DE TALLER ABIERTO: +34 617 34 03 23

O cine fantástico e de terror insuflou vida a criaturas que hoxe forman parte do noso imaxinario e dos nosos peores pesadelos. Estes seres, xurdidos das lendas e dos mitos ancestrais, da literatura secular, ou de creacións ex profeso para a gran pantalla, encarnan os temores e os medos dos seres humanos ao longo do tempo.

Os exemplos son múltiples, dende a estilizada e ominosa sombra vampírica ata ameazantes monstros de orixes e formas diversas, sen esquecer personaxes que agochan escuras intencións. Estas criaturas, máis alá de asustar ou facernos tremer polo seu aspecto, son empregadas a miúdo no eido da creación, pois permiten indagar no fondo da alma humana materializando o abstracto mediante presenzas —fascinantes, grotescas e icónicas— que impregnan atmosfericamente a memoria colectiva secular.

Partindo deste contexto, propoñemos un obradoiro dirixido a nenos e nenas de 8 a 12 anos que achegue personaxes míticos do xénero de terror e do fantástico a través dunha actividade plástica que conxuga a imaxinación e a creatividade para deseñar criaturas aterradoras mais atractivas e fascinantes a partir de recoñecidos exemplos da historia do cinema.